Kuch Shaayri...

'Safar'

Haan yeh to maannaa padegaa
Ke kuch waqt bhatak gayi thi raah
Kisike aanganke phool dekhkar
Anjaaneme dil mein uthi thi chaah

Ke kabhi hogaa aashiyaan hamaaraa
Jaisa hum sajaaenge
Ke zindagi mein aayegi bahaarein
Jahan bhi hum jaaenge

Aakhein dekhne lagi thi sapne
Pighal rahe the samjhote
Lagaa thaa kismat saath degi to
Hum bhi jannatmein hote

Mili thi daad kabhi kahin
hamaare bhi gungunaane ko
Alfaaz hamaare tarase the
Kisika dil lubhaane ko

Bhool gae the ke in hotonko
Hasneka koi haq nahi
Karz nahi utar jaate saare
Shayad tab taq nahi

Ke hamaari zindagi hamari nahi
Doosaronki amaanat hai
Kisiko kyon fark pade
Kya hamaari chaahat hai...

Paaonmein bediyan aur sar pe bojh
Aisa hi ye safar chalnaa hai
Bhool gaye the ke hamara sooraj
Shaam se pehle hi dhalnaa hai

Lekin haan ye to maanna padega
Ke khushi kuch nivaale to mile
Unhi ko simatkar aansoo dabaae
Hum zindagike safar ko chale...

...Pradnya Joshi
7 March 2007